【職場生存必備系列—適應能力(下集)】#適應能力
新加入一間公司，必然要渡過一段適應期。尤其係啱啱畢業嘅新鮮人，由校園走到職場，收起嬉笑怒罵，變到一臉正經，慢慢適應人情世故、公司文化、階級觀念，好多嘢都靠自己摸石過河。如果少啲職場適應能力，輕則經常轉工，重則驚咗返工！今日就教大家點樣提升職場適應能力：
第一，保持求知好奇心
每份工作都未必咁有挑戰性，甚至會枯燥乏味，但如果能夠保持好奇心，不單止學到新知識，亦可以早日適應環境，搵到自己想發展嘅位置。
第二，多同同事交流
做新仔唔好怕羞，多啲同同事交流，喺對方身上了解公司文化同埋不成文規定；工作上遇到唔熟悉嘅事，嘗試過後解決唔嚟，就要禮貌地請教同事同上司，一方面增加彼此互動，另一方面加快熟悉新工作嘅腳步。
第三，適當舒緩壓力
工作上有壓力係平常事，有人會激起鬥志，亦有人會你佢不振。如果壓力大到難以承受，就要搵專業人士協助，或者同親友、前輩傾訴，同埋搵出舒緩壓力嘅方法。
第四，謙虛同妥協心態
喺職場上不宜太過張揚，以免引起大家嘅反感。無論上司同同事有幾多缺點同難頂，你都應該保持謙虛嘅態度，對佢哋多支持、虛心學習，藉此提高自己能力，有利更好嘅事業發展。
第五，同上司相處之道
同上司相處，要將心比己，唔單止工作上交流，亦需要個人上交流。但切記分清楚彼此上司同下屬嘅界線，唔好因為同上司關係好，就貿然講咗同做咗失禮嘅說話同舉動。
第六，同同事相處之道
同同事之間嘅互動關係，影響到工作質素、效率同表現，甚至影響埋團隊精神。有時同事對自己訓話嘅態度同方式，當下可能會覺得難受，但換過角度諗，如果前輩俾嘅忠告幫自己撞少啲板，咁就應該坦然接受喇。
一個員工會唔會得到老細賞識，除咗考慮工作能力之外，適應能力亦係重點之一。如果員工嘅適應能力夠強，靈活多變，面面俱圓，工作容易上手，同同事相處融洽，老細可以煩少樣「人事磨合問題」，已經係幫咗一大忙。所以職場上發展唔如意，拍拍屁股瀟灑走人前，不妨嘗試調整心態，或者會有另一番新景象。
Search